政情：傳聞入閣 蘇紹聰：廚房冷熱都唔入
律政司司長袁國強短暫留任，以處理一地兩檢等「手尾」係政圈公開秘密，律師會會長蘇紹聰（Thomas）係盛傳接任人選之一。Thomas尋日同傳媒午宴時，笑稱自己「煮嘢唔叻」，又話「廚房凍定熱都唔想行入去」，拒認入閣傳聞。
公餘時間鍾意行山嘅Thomas，早前由東涌行去大澳，中途見到施工中嘅港珠澳大橋，仲用望遠鏡觀看半沉入水底嘅人工島部分，好似視察地盤咁。被問到嗰次「視察」係咪為接任律政司司長鋪路，佢就笑言唔識煮飯，廚房冷熱都唔願入去，但佢亦不忘話好尊重喺政府工作服務社會嘅人，未為入閣傳聞封後門。
唔贊成郊園邊陲地建屋
提到行山，Thomas認同近年多咗訪港旅客親親大自然，又話：「下星期（十一假期）會去龍脊，包你多人到好似旺角咁」，仲話試過行上龍脊時，上落山都要排隊，非常誇張。對於郊野公園邊陲係咪納入建屋地嘅討論，佢坦言作為行山人士，唔希望郊野公園變成大廈，又指本港部分山勢險要，起樓難度好大，但佢都話要兼顧社會各界利益，如果係邊陲嘅平緩地帶，就可以進行討論。