政情：廠商會會長選戰和諧背後多暗箭

據聞，近排兩大陣營文宣攻勢加溫，仲有唔少投訴信射向秘書處。聽聞呢啲投訴信好多係冇厘頭，講出嚟都唔係幾啱邏輯，但既然有人投訴，秘書處就要認真處理。之但係依家係選會董嘅關鍵時刻，兩邊陣營第一仗係要打贏會董選戰，事關會長係由會董投票選舉產生，當然要用盡方法去鞏固自己嘅實力喇！

憂內部撕裂 會董設宴做和事老

眼見兩邊陣營鬥得咁勁，唔少廠商會資深會董擔心一場選戰令到廠商會造成撕裂，於是想方設法做和事老，希望選戰和諧啲。廠商會旗下品牌發展局主席黃家和早兩日就喺自家餐廳設宴，邀請吳宏斌同徐炳光向廠商會中人講解參選政綱。

據聞當晚原本氣氛好和諧，屬於吳宏斌競選辦主任嘅廠商會副會長楊志雄仲拎咗大閘蟹去「加餸」，食得大家幾開心。點知有位副會長突然爆肚批評李秀恒，雖然李秀恒唔在場，但都頓時令到氣氛好尷尬。

尋日喺會員大會上見到黃家和，問番佢當晚情況，佢就唔係幾想講，強調係私人飯局。佢話理解助選人士各為其主，有時言論尖銳少少，原本喺民主選舉過程中都好正常，但係佢同好多會員、會董一樣，都唔想見到廠商會好似特首選舉咁，選後造成撕裂，畢竟廠商會咁多年來為香港社會做咗好多嘢，無謂將時間、精神花喺內耗。無論最後由邊個勝出，最緊要帶領廠商會更上一層樓。

吳宏斌同徐炳光尋日都有到場。講起最近兩邊陣營又拍片、又印政綱、拉票，背後仲有一大班競選團隊，搞到好似特首選舉咁，吳宏斌就話要「選賢與能」，徐炳光就重申無論結果點，最緊要保持和氣。