中環出更：自嘲老牛聲 周浩鼎獨唱好驚青
唔係個個都夠膽踏上台板，何況係自嘲老牛聲嘅立法會議員周浩鼎（Holden）。佢話早前喺一個大型活動上要唱歌，淨係獨唱一句都好驚會走音。
Holden話記憶中只係曾經畀小學音樂老師讚過佢唱歌唔錯，但當時連聲都未變，當然唔能夠作準，後來升上中學就已經變成一把老牛聲，所以更加唔會唱歌，所以喺嗰次演出對佢嚟講係好大挑戰。
為表演唔食煎炸嘢
佢仲講到演出前幾日腦海成日出現演出曲目，所以喺屋企都會忍唔住練習，而佢為咗表演都避免食煎炸嘢。
咁開聲方法呢？佢就話表演時每人輪住一句獨唱，佢就會跟住前面幾個，提早開聲唱以捉摸音準，咁就可以減少咗走音出現，佢更大嘆表演絕對唔可以缺少綵排。
睇嚟佢係經過一輪苦練同埋老師指導，先應付到嗰一句獨唱喎，唔知佢敢唔敢挑戰唱晒全首歌呢？
卓妮