中環出更：陳郭詩慧做女會長堅持家庭第一
香港化粧品同業協會（協會）早前舉行第十八屆會員大會，選出理事長陳郭詩慧（Melody）成為協會新一屆兼首位女會長，接替卸任的會長何紹忠。成為協會首名女當家，Melody話雖然賣化妝品嘅男士不斷增長中，但管理層都好多男士，巧合地今次先第一次有女會長，不過佢嘅小朋友仲好細個，所以幾忙佢都係家庭第一，盡量平衡工作同與屋企人相處的時間。
Melody話男售貨員賣化妝品不斷增長，其實佢爸爸、協會執行顧問郭少明，咪就係第一代賣化妝品嘅男售貨員囉。郭少明話當年係怕醜仔一名，一見到客人入嚟就匿埋喺後面，多得太太郭羅桂珍推佢出嚟，先發現原來男士賣化妝品一樣得。
郭少明話男士多數買眉筆
郭少明仲話依家成日喺屋企敷面膜，仲叫卓妮估吓唔計香水嘅話，最多男士買嘅化妝品係乜嘢？卓妮以為係遮瑕膏，點知原來係眉筆！佢話依家年代唔同咗，無論男女都好注重自己嘅儀容，男士除咗會買香水令體味更平易近人外，仲好多都會修眉，只要堂眉有神，成個人都會靚仔晒喎。
Melody就畀貼士，話好多女士覺得好香嘅氣味男仔未必鍾意，而好多女士鍾意化嘅妝容男士又未必覺得靚，所以女士喺買化妝品尤其係香水時，特別鍾意問男士意見。
同場仲有仁濟副主席鄧肇殷、理事洪玉芝等。鄧肇殷就笑言愈來愈多男售貨員賣化妝品仲有個好處，就係方便換燈泡，又指男士同女士嘅長處同體能天生唔一樣，講笑話捉賊都跑得快啲啦！
卓妮