香港政府成日畀人話「委員會治港」，連食物減鹽減糖都煞有介事，整個專責委員會，結果係點大家有目共睹，大多數委員會一事無成，吹水多於一切，咁最近風風火火成立嘅「土地供應專責小組」又會唔會係例外呢？怕且都幾難樂觀。
呢嗱，小組成立個零禮拜之嘛，主席黃遠輝就為大家帶嚟壞消息。對於坊間有建議收回軍事用地興建樓宇，佢強調要同中央商討，即使中央同港府達成共識，軍事用地嘅土地潛力亦未必好大。佢又話，將所有新開發土地用嚟興建住宅嘅建議未必係社會共識，強調冇可能單靠一個選項解決問題，社會必須有所取捨喎。
冇錯，軍事用地只係土地供應其中一個選項，之但係市民要問嘅係，大量閒置嘅棕地用唔用得、權貴高爾夫球場以至賤價租用官地嘅私人會所又用唔用得？港府土地政策之所以為人詬病，正係因為捨難取易，淨係識得向弱勢群體埋手，毀人家園，再唔係就填海或者打郊野公園主意。講真，撇開嗰班「環保原教旨主義者」唔講，好多市民其實唔介意開發郊野公園土地，但前提係政府要畀市民睇到真係「寸土必爭」，而唔係好似依家咁側埋一邊。
有人質疑小組成員立場偏向政府，支持開發郊野公園有之，主張填平船灣淡水湖起樓者有之，港府擺明係先有立場，再搵「轎夫」抬轎，根本就係一場假諮詢。即係咁，小組最終有乜結論，言之尚早，但就算出到嚟唔啱政府心水，港府亦唔一定從善如流，照單全收。大家應該記得，港府明明有晒既定立場，死都唔肯搞全民退保，但又扮晒傾聽民意，委託港大退休學者周永新做研究，結果周教授畀人擺上枱，不歡而散之餘仲同林鄭隔空罵戰，土地小組會唔會重蹈覆轍，都幾難話得埋。
退一萬步講，即使一切順順利利，小組又要進行公眾諮詢，又要內部討論、撰寫報告，趦趦趄趄最快都要出年年尾至交到報告，加上港府覓地蝸行牛步，起得樓嚟蚊都瞓蛇都死。話時話，港府最近提出興建「港人首置上車盤」，話要幫從未置業嘅年輕家庭上樓，吹到天花龍鳳，問題係沒有麵粉，哪有麵包？搵唔到地，盞煲無米粥嘅咋。
港府同社福機構合辦「良心劏房」，聽聞反應唔錯，但港產官僚千祈咪鬆毛鬆翼，事關咁樣只係反映無殼蝸牛水浸眼眉，跪地餼豬乸，求其有個竇口遮風擋雨，連劏房都有殺錯冇放過。講一千句漂亮話，不如做一件實事，一味整色整水小打小鬧，呃唔到市民o架！