政情：今日你上鏡：再戰建築界補選？林雲峯話諗吓先

高等法院早前裁定建築、測量、都市規劃及園境界議員姚松炎等人喪失議員資格，意味呢個功能界將要進行補選。喺舊年立法會選舉中，呢個界別嘅上屆議員謝偉銓尋求連任失敗，外界普遍認為係因為同屬建制陣營嘅建築師學會前會長林雲峯參選，分薄咗票源，民主陣營嘅姚松炎先至漁人得利勝出。早前林雲峯出席一個活動，梗要問佢今次會唔會再參加補選，佢就大耍太極，冇正面回應，只係話慢慢諗吓先，真係選先講喇，又話政府都未公布補選程序，要睇吓幾時搞先喎。聽佢咁嘅語氣，唔通歷史真係有機會重演？