政情：鍾國斌少買衫 寧着行家樣辦
立法會紡織及製衣界議員鍾國斌（Felix）做製衣生意，但係佢似乎唔貪靚。事關佢自稱好少買衫，有時着番自家出品嘅衫，有時同做製衣嘅朋友傾開，若有啱心水嘅就會請朋友拎件樣辦嚟着喎。
讚港研紡織新技術「再工業化」
Felix話，男人比較少買衫，就算成日着嘅西裝，佢都會着到爛先會買，為咗推動環保，佢都會將啲舊衫拎去回收。講起回收舊衫，Felix話，理工大學紡織及製衣學系有份承辦嘅香港紡織及成衣研發中心，早前研究將回收咗嘅衫，利用技術將衣物中嘅纖維取出，再重新織成新衫。佢話呢個技術已經好成熟，最近獲一間香港公司投資，仲計劃遲啲喺香港開紡紗廠添！
Felix話，三十年嚟香港紡織廠只有執，冇再開新廠，依家有由香港人研究、投資及生產嘅紡織廠，正宗係香港製造，難怪佢大讚係一個再工業化嘅好古仔喇！