中環出更：林正財熱愛單車 年踩萬里
愛車嘅男士都好鍾意風馳電掣嘅快感，行政會議成員林正財都唔例外，不過佢追求呢種快感嗰陣就唔係揸車，而係踩單車。林正財話，自己每個星期至少都要踩二百公里單車，呢個係佢自訂嘅目標，而佢亦都一直保持到。佢笑稱自己部單車嘅里數應該高過部私家車喎。
參加過職業賽 與黃金寶同場
林正財一直都好鍾意踩單車，佢自爆以前參加過職業賽，仲同本港單車好手黃金寶同場添。雖然入咗行會之後工作更加忙，但佢都盡量保持一星期踩二百公里嘅目標，有時太忙幾日冇踩單車，佢就會一次過追番啲里數，試過最多一次踩一百公里添！點解要踩咁多？佢就話一年至少踩一萬公里係職業單車手最低嘅操練水準，雖然自己唔係職業車手，都唔想差距太遠喎。
經常踩單車，照計應該周圍去，不過林正財踩嚟踩去都係同一條路線，經常去嘅就係青山公路小欖段，來回青龍頭至小欖迴旋處。佢仲話，最想就係參加環法單車賽，不過都要有時間先得咁話。
卓妮