中環出更：李秀恒講效率親筆求職信反扣分
智能手機同電腦當道，依家啲人親筆寫字嘅機會愈嚟愈少，不過書法呢種中華國粹仍有大批擁躉，中華廠商聯合會（廠商會）會長李秀恒就係書法愛好者。雖然係咁，但李秀恒就唔係太欣賞親手寫嘅書信，話若果收到寫得一手靚字嘅求職信，印象分可能不加反減。因為今時今日講求效率，用手寫信畀人感覺落後，字迹幾靚都冇用，行文通順同簡潔易明更加重要喎。照咁講，「字乃人之衣冠」嘅傳統觀念咪過晒時？
講就咁講，李秀恒話見到字迹優美嘅朋友信件，佢都好欣賞嘅。佢自己讀小學嗰陣就曾經奪得全港書法公開賽鋼筆組冠軍，仲拎到獎金五十元，事隔多年仍然難忘當年喜悅。喺佢穿針引線下，本月底廠商會將會喺中央圖書館舉辦書法碑刻展覽期間，同場進行書法比賽，期望市民欣賞內地名書法家碑刻喺玉石嘅墨寶之餘，亦可以提升自己嘅書法水平。
楊立門倡學校恢復書法堂
廠商會行政總裁楊立門同副行政總裁羅蕙英都好鍾意寫書法。楊立門話自細就聽爸爸勸勉，學中文嘅人須字體端正，否則就會好失禮，所以佢閒時亦會練吓字，過年都會寫揮春。現時學生哥已經唔使上書法堂，楊立門認為應該恢復，至少一星期一堂，事關書法係一種文化修養，亦可以鍛煉觀察力同埋美感，好值得提倡嘅。
羅蕙英就因為爸爸寫字好靚，所以佢自細字都寫得唔錯，學生時代經常畀老師讚。佢仲打算退休後拜師學藝，務求令自己嘅書法精益求精咁話。
卓妮