古人話︰「智者察於未萌，愚者喑於成事。」港產官僚後知後覺，踢一踢郁一郁，計劃永遠落後於變化，有咩法子唔七國咁亂吖。
又到九月一號開學，今年最特別係部分學校雙非童「甩底」，搞到校方大失預算。其中位於天水圍嘅中華基督教會方潤華小學最誇張，今年獲教育局分派超過四百名小一新生，當中約三百五十名雙非童選擇回流，真正報到嘅學生得番一百三十幾人，亦因為咁，該校由原定開設十七班小一大幅減至六班。師生比例驟降，本地家長自然無任歡迎，之但係一下子冇咗咁多學生，你話學校同老師唔愁飯碗不保就假嘅。
講真，雙非童回流早就有迹可尋。舊年年初廣州等城市開放「返回機制」，容許雙非童加入內地戶籍，深圳之後亦跟進，直到今年正式接受冇本地身份證嘅學童入讀公立學校，照計本港教育官僚有足夠時間評估影響；而教育界人士亦一早預警，雙非學童大規模回流潮，將會打亂原來嘅資源配置計劃，甚至可能要減班添。
正所謂「春江水寒鴨先知」，因為「影子學生」及校政紊亂搞到天怒人怨嘅興德學校，之前就有教師投訴被派上深圳「拉客」，儼然敲響警鐘，家陣分派學生遠高於實際人數，證明教育局班官老爺從來冇走出冷氣辦公室做吓田野調查，「堅離地」到冇朋友。
雙非學童回流潮殺香港一個措手不及，教育官僚麻木不仁固然難辭其咎，背後亦反映部分教育界人士嘅傲慢心態。有啲人一味迷信香港「制度優勢」，以為就算雙非學童家長有得揀都會留喺香港，實情係內地發展一日千里，早就今時唔同往日，好多選擇回流嘅家長都話，對深圳學校中文教育等方面較有信心。退一萬步講，雙非學童每日跨境返學舟車勞頓，來回閒閒哋唔見幾粒鐘，嗰種辛苦法不足為外人道，父母唔忍心都係人之常情。
姑勿論點講都好，雙非學童成為歷史陳迹，已經係大勢所趨，當局有乜因應之道？想當年曾蔭權爵士無力鼓勵本地父母「生三個」，將內地雙非童視為補充人口嘅靈丹妙藥，結果醫院床位以至學位等都跟唔上，反而激化中港矛盾，弄巧成拙；情況同開放內地個人遊一樣，旅客太多吃不消，旅客太少又呻食唔飽。搞成今日咁，都係港府決策見步行步，欠缺通盤規劃種嘅禍。
講到底，雙非學童回流，教師飯碗不保仲係其次，人口老化問題先至大鑊，林鄭當年做政務司司長，一直主掌人口政策，就睇吓佢有咩符弗！