政情：為科大迎新 陳繁昌夾band失晒聲
香港科技大學尋日舉行一系列活動，歡迎學生開展新學年。任期只餘一年嘅科大校長陳繁昌瞓身迎新，先喺門外向學生派能量棒，希望同學仔喺新學年充滿能量應付各項挑戰，之後更喺校內夾band，同學生一齊演奏勵志歌。
搖滾Look彈結他
陳繁昌戴上Cap帽，喺西裝恤衫上面套一件T恤，手背就印上科大嘅水印紋身，一副搖滾形象。佢同學生一齊演奏勵志歌《同舟之情》，彈結他嘅佢盡顯功架，圍觀嘅同學睇落相當受落，不停揮手配合音樂節拍。陳繁昌演出後自爆，原本佢係又彈又唱，但因為早前演練時用力過度，加上近日有傷風感冒，結果搞到失晒聲，冇得唱。
任期剩番一年，陳繁昌話希望科大除咗追求學術成績之外，亦可協助學生嘅課外發展，例如音樂方面。尋日一眾學生亦爭住同佢合照，陳繁昌亦來者不拒，甚至同學生玩自拍。陳繁昌早前向校董會請辭，將於下年九月一日離任。