政情：李萃珍期滿停署任 泛民建制亂抽水
青嶼幹線上月二十一日首個工作天實施雙向收費，運輸署被指準備不足引致大塞車，當日署理運輸署署長一職嘅副署長李萃珍都認衰，向公眾道歉表示「唔好意思」。尋日政府刊憲，宣布李萃珍今日起停止署任署長，改由另一位副署長鄧偉亮頂上署理署長職務，有關調動隨即引起政界猜測，指李萃珍係咪因為青嶼幹線雙向收費甩轆而孭鑊，被「降回」原職呢？
民主黨立法會議員尹兆堅認為今次運輸署人事調動唔尋常，認為李萃珍喺上任後無處理過重大事情，但喺青嶼甩轆事件後就被停任，似乎係政府要搵「替死鬼」。佢又質疑調職反映當局承認事件有官員行政失當，要求當局向公眾同立法會交代添。
質疑同青嶼甩轆一事有關
民建聯議員劉國勳亦指李萃珍停任署長，以及青嶼甩轆事件相隔唔夠一個月，直指兩者「不禁令人有無限聯想」，又唔點名批評李萃珍，質疑因為有官員表現唔達職位要求，先至遭停止署任。
泛民建制都對今次調職狂抽水，但其實係亂抽水，事關運輸署就回應話，早喺七月已定好李萃珍署理運輸署署長一職至尋日，之後由鄧偉亮署理署長一職，直至新署長上任；同時李萃珍由今日起開始放假，直至本月十九日。