政情：李志峰創商機 辦主題體驗店
最近全球知名嘅商界龍頭先後發表電子商務即將踏入末日嘅言論，引起好多趨勢研究者嘅關注。九龍東區各界聯會會長李志峰（Reynold）好有同感，認為以前網上交易冒起，令實體店飽受衝擊，依家確實有行番轉頭嘅趨勢。佢睇好網上及實體兩者共融嘅商機，最近就喺尖沙咀開咗一間以荷蘭知名畫家授權品牌為主題嘅體驗店。
吸引內地投資者注意
結果間舖頭喺試業期間，就引起唔少內地商場投資者嘅注意，仲邀請Reynold去內地開店添！間體驗店表面睇係餐廳，查實入邊仲有同一畫家品牌嘅鐘錶賣。
早幾日香港鐘表業總會前副主席徐珊雯同埋香港表廠商會會長林偉雄就相約去試菜，事關畫家品牌時鐘就係徐珊雯代理嘅。
Reynold形容體驗店係借用人哋品牌，進行二次創作，然後就變成香港品牌。雖然依家已湧現內地商機，不過Reynold話唔想行得太急，要等香港旗艦店嘅營運模式穩固先講。