政情：CY一落台 梁繼昌即行運
新一屆政府上任時大吹「和風」，兩個多月以嚟推出嘅措施、政策都同前特首梁振英（CY）有好大分別，好明顯係要同CY劃清界線。政府尋日公布委任工業貿易諮詢委員會新委員，之前畀CY窮追不捨、連續發網誌攻擊兼控告誹謗嘅專業議政成員、會計界議員梁繼昌（Kenneth）竟然榜上有名。CY一落台，新政府就立即委任佢眼中釘Kenneth出任重要公職，唔通係想剝CY棚牙？
新政府早前競選時就承諾，會發展再工業化嘅政策，仲希望參與更多一帶一路同粵港澳大灣區嘅發展。上任兩個月，政府宣布將工業貿易諮詢委員會同紡織業諮詢委員會合併，希望委員會可以就影響香港工業及貿易嘅事務向政府和有關部門提供意見，推動本港與內地喺紡織品及成衣貿易、以及內地貿易關係。好明顯工貿發展將會係未來施政嘅重點之一。
獲委任工貿諮詢委員會委員
一個咁重要嘅委員會，政府就委任咗唔少「信得過」嘅人，包括大律師公會主席林定國、律師會主席蘇紹聰、工總主席郭振華、旅發局主席林建岳以及民主思路理事麥嘉晉；至於議員方面就有批發及零售界議員邵家輝、進出口界議員黃定光，以及身兼行會成員嘅葉劉淑儀。委員主要係專業界別或者建制派人士，不過最估唔到嘅係身為CY眼中釘嘅Kenneth都喺委員之列。
Kenneth對於自己獲委任唔感驚訝，佢話唔揣測新政府委任自己嘅原因，亦唔方便透露由邊個邀請佢加入委員會，不過佢就承認新政府明顯想畀人知道自己同CY係唔同嘅人，委任公職時亦都唔似以前咁「分餅仔」。佢強調自己已經多次出任公職，即使畀CY控告誹謗期間亦獲委任為強積金計劃諮詢委員會委員，佢相信係因自己專業背景同能力先獲得公職，又話唔可以用單一事件評估新政府係唔係「吹和風」。
CY之前同Kenneth勢成水火，CY仲搞出首宗特首控告議員嘅案件，原本以為Kenneth都有排頭痕。點知「人走茶涼」，CY一落台，Kenneth即刻有運行，所以話「政治一日都嫌長」喇。