中環出更：開學日 政界爸爸忙住湊仔女
尋日係莘莘學子嘅開學日，多名政界爸爸都親自湊仔女返學。好似育有一對龍鳳胎嘅立法會議員譚文豪（Jeremy）同勞工及福利局副局長徐英偉，尋日朝早都放低忙碌嘅工作，湊仔女返學，享受親子時光。不過深水埗區議員李梓敬就去醫院接讀幼稚園嘅大仔出院，事關個仔因為感冒入院，唔可以同其他小朋友一樣開心開學喇！
Jeremy尋日喺社交網站貼上一對子女揹書包嘅背影，原來一對龍鳳胎尋日第一日返幼稚園，Jeremy唔單止管接管送，更加陪埋上堂。Jeremy話一對仔女已返咗一年幼兒預備班，所以尋日都冇喊住要搵爸爸，反而同同學玩得好開心。Jeremy強調自己唔係「虎爸」，唔會刻意安排子女讀名校，揀幼稚園都係以近屋企為原則。
徐英偉呻仔仔「有朋友無老竇」
徐英偉嘅細仔今年升讀幼稚園高班，而大仔就升小三，所以佢湊返學已經相當有經驗。徐英偉大呻仔仔係「有朋友無老竇」，因為一落車就頭也不回咁直奔校園去搵好朋友。佢又話，上月初開始出任副局長之後，就少咗好多時間陪小朋友，所以都好珍惜車佢哋返學嘅短暫親子時間。
城中父母忙住湊仔女返學，李梓敬就要接大仔出院。因為讀幼稚園嘅大仔已返學兩星期，但係早幾日就感冒，仲引發支氣管炎搞到要住院添。講開返學，李梓敬話自己都即將重拾書包，入讀城市大學嘅法律博士課程，佢笑稱好緊張，所以明白囝囝初入學嘅心情喎。
卓妮