政情：馬紹祥獲批准做科技園顧問

新政府上任兩個月，未有過渡嘅前高官亦都陸續搵到好路數。政府尋日公布，發展局前局長馬紹祥獲批准過檔香港科技園出任顧問一職，下個禮拜一就會履新。之不過，前任行政長官及政治委任官員離職後工作諮詢委員會就講到明，就算批准佢返新工都好，都建議佢唔好參與競投與發展局相關部門嘅項目，亦都唔可以就港深創新及科技園嘅有關事宜接觸發展局或者相關部門。