政情：蕭嘉怡寫信 告別中西區
今日履新政務司司長政治助理嘅民建聯蕭嘉怡（Kathy），最近向各方友好發出告別信函，回想過去十年，包括出任中西區區議員近六年嘅點滴。Kathy信中自爆「理想很豐滿，現實好骨感」，當年首次上門家訪時，「手在叩門心在震」，另外首次喺街頭派單張要迎來人哋探視嘅目光等，佢承認曾經有懼怕、有迷惑，但都選擇繼續挑戰自己。
轉職政助 今日履新
Kathy嘅告別信函名為「嘉怡的話」，旁邊有一張佢同囡囡嘅合照。佢喺信中首先交代今日會加入政府，已辭去中西區區議員職務，其後又提及過去十年嘅變化，包括由鄰家女孩變成一名母親，佢重申自己非離開中西區，而係決定將服務社區嘅心擴展伸延至整個社會，因此希望未來繼續有大家相伴喎。
話時話，新政府要求政治委任官員要多啲落區，而且要盡快走遍全港十八區，唔知Kathy做官後首次落區，首選會唔會係返去佢從政嘅起點中西區呢？