通報機制如虛設 粵港合作得把口

高鐵香港段通車在即,香港正式納入珠三角一小時生活圈,因乜解究粵港兩地政府部門訊息互通,居然要花足足兩日時間呢,唔通官老爺仲停留喺飛鴿傳書年代?

功夫茶講緊嘅,之唔係早排珠江貨船相撞引發棕櫚硬脂襲港事件囉。事發後內地當局足足拖咗兩日至向香港方面通報,環保署官僚一味死撐,話因為撞船後內地部門認為唔會影響香港,所以未有通報,之後發現有擴散迹象,已經立即通報香港,事件不涉延報云云。

正所謂解釋等於掩飾,市民當然唔會收貨。正如「東方報業民意調查」顯示,大部分受訪者狠批粵港兩地通報機制失效欠透明度,空談合作。

係人都知,油污隨水流擴散,香港位處珠江下游,食到應一應,廣東方面懶懶閒關人個關,等到一發不可收拾至施施然通報香港當局,蚊都瞓蛇都死。有環保人士就講得啱嘞,如果當局發現油污後,可以第一時間雙管齊下,設置海上浮欄同隔油浮欄,就唔使搞到污染物沖上岸,溶化後混和沙石咁難清理。事實上,大嶼山唔少養魚戶就反映死魚數目大增,上述民調顯示,唔少受訪者擔心進食受污染海產,咁咪即係延誤通報靠害囉!

講開又講,粵港合作聯席會議,近年來大大話話,涵蓋多個範疇,簽署嘅協議不知凡幾,其中就包括就海上垃圾問題成立通報警示機制,包括實時監察珠江流域嘅雨量數據,以及打擊非法傾倒垃圾入海等,係威係勢咁款,點知一次漏油事故就露晒餡,兩地政府倒瀉籮蟹,足以證明所謂通報機制,根本係形同虛設。

正所謂一節見則百節知,內地同香港交流日益密切,上面打個乞嚏,香港隨時都會感冒,由疫情控制到食品安全到空氣污染監測,兩地訊息交流愈來愈重要,家陣進入互聯網時代,好多嘢都可以做到實時監察,通報機制理應更加完善。當然喇,制度始終要靠人嚟執行,國產官僚掉以輕心,港產官僚把關不力,講乜都嘥氣。當年沙士一役,內地隱瞞疫情搞到香港雞毛鴨血,嗰筆姑且唔提,淨係講番今次漏油事件,港產官僚第一時間唔係同內地部門交涉,而係淡化事件,一時話「即食麵都有棕櫚油」,一時話飲咗含油脂嘅海水都唔使擔心,粉飾太平成咁,試問市民點會有信心吖?

咪話功夫茶唔提醒,今時今日中港矛盾日益熾烈,任何民生事件都有可能被有心人上綱上線,借啲意挑動事端,整多幾單漏油事故,宣傳幾多高鐵、大灣區生活便利,只會事倍功半嘅咋!