政情：八網難逃：吳永嘉去夏威夷 諗起港沙灘污染
炎炎夏日，去享受陽光與海灘就最好不過啦！立法會議員吳永嘉（Jimmy）早前就趁立法會休會，同太太一齊去夏威夷輕輕鬆鬆咁休息番幾日，但Jimmy見到當地風光如畫嘅海灘，都不禁諗起香港受棕櫚樹脂污染嘅沙灘，仲話希望可以盡快清理沙灘油污。
Jimmy上載咗幾張去夏威夷度假嘅相片去Facebook，相中可見當地天氣好到不得了，佢仲喺當地靶場大顯身手，戴住耳塞同埋太陽眼鏡，全副裝備落場練習射擊，仲話自己長短槍都各自試咗幾款，感覺仲好正添！
望盡快清理棕櫚樹脂油污
但當佢喺當地歎世界嘅時候，都冇唔記得香港有唔少沙灘受棕櫚樹脂污染而要封閉，仲話自己一睇番啲相就諗起香港啲沙灘，希望沙灘油污可以盡快清理，辛苦晒各位清潔工喎。
老實講，受到油污染，香港唔少沙灘都要封閉，仲有啲油污漂入魚排，嚴重影響海洋生態同養漁業，事件發生咁耐，啲油污仲未清理完，真係唔知點算好。