政情：鄧家彪空降新東 民記樁腳唔幫拖
工聯會（工記）成員鄧家彪（Bill）打算爭奪由青年新政梁頌恆喺宣誓風波中所產生嘅懸空議席，借未來嘅新界東補選重返立法會，更加喺上月底加入民建聯（民記）希望增加勝算機會。但聞說民記嘅地區樁腳態度消極，主要係覺得阿Bill空降新界東係爭飯食，影響佢哋上位嘅機會，依家都係靠工記嘅樁腳帶佢落區。換言之，民記樁腳根本唔想幫拖為佢抬轎。
不滿「爭飯食」 助選態度消極
據聞阿Bill加入民記時，有指佢入埋民記沙田支部，令人相信佢會由離島轉戰沙田。有民記中人明言，地區樁腳不甘作嫁衣裳，更擔心阿Bill勝出補選後，會喺下屆區議會轉到沙田，爭奪出選機會，所以佢哋對助選態度較為消極囉！
民記中人又透露，阿Bill係以普通會員身份加入民記，因此無權參與民記會議，包括地區委員會，意味住難以掌握地區民情。再加上民記樁腳態度欠積極，又點會帶佢落區，所以即使佢已加入民記，都只能靠工記樁腳帶佢落區去接觸市民。
勞工議題立場分歧惹尷尬
另外，有民記領導層認為阿Bill雖然有個人性格，但工記味道過於濃烈，每逢有勞工議題，立場就太過貼近工會，而且回應太快，未有考慮同民記嘅分歧，變相令到民記尷尬喎。
該名領導層更話民記票源唔一定可以全數過畀阿Bill，因為同選民立場唔一致係難以取得佢哋嘅信任一票，所以就認為佢要作出調節，多啲落區聽意見咁話！不過佢只能靠工記樁腳落區，要調節都怕且相當困難。
其實民記當中亦有唔少想參加補選嘅人，好似民記早前就補選搞黨內初選，都有人報名競逐出選新東，正所謂多隻香爐多隻鬼，所以都唔難理解民記樁腳會唔服阿Bill同佢哋爭上位機會。
想當年工記同民記分家，都係同對勞工權益立場有關，依家阿Bill不惜走回頭路想爭取更高勝算，反而再次激發矛盾，變咗適得其反，再加上以前民記仲有地區組織公民力量幫手，後來因為唔想再幫民記抬轎而自力更生，之後仲同新民黨「結婚」，畀容海恩上咗位添！建制派之間都咁大競爭，阿Bill今次嘅決定係咪錯咗呢？