中環出更：陳帥夫話立法會係睇唔完嘅書

適逢尋日係香港第十屆模擬立法會嘅閉幕典禮，模擬立法會係畀一班中學生模擬自己係議員、政黨成員，體驗立法會內外嘅工作。陳帥夫喺致詞時就大讚依家嘅中學生已可就議會運作方面做討論，甚至會寫埋「好厚嘅議案」，佢仲自爆，話自己中學時「民智都未開」。佢又認為如果學生只透過媒體嘅片段去了解議會運作，會「失諸偏頗」，呼籲佢哋盡早認識議會嘅運作。加入咗政府超過廿年嘅佢話，每屆立法會都各有特色，又形容立法會係永遠都睇唔完嘅書，仲話每個章節都好精彩。

新任教育局副局長蔡若蓮都有出席活動，佢喺致詞時向台下問好，點知冇人有反應，搞到佢好尷尬咁再講多次「大家好啊」，但係台下反應就麻麻，得一把男聲回應話「好啊」。

容海恩讚學生表達手法佳

同場仲有幾位立法會議員，包括梁繼昌、盧偉國同容海恩。容海恩亦大讚其中一組學生表達議案嘅手法相當好。佢仲教路，話有時議案內容冇咁重要，表達得好聽先會有人留意。佢仲講笑咁用靚女做比喻，話「靚女都畀人望多幾眼啦」，隨即引嚟台下拍手和應，唔知大家係咪讚緊佢嘅比喻夠晒貼切呢？

蔡若蓮（左）遇到梁繼昌（右），即刻遞上卡片。

盧偉國（左一）同容海恩（左二）都有出席模擬立法會閉幕禮。

卓妮