開講有話︰「時間就是金錢，效率就是生命。」廣深港高鐵香港段通車後，連接珠三角一小時生活圈同埋全國一日生活圈，橫睇掂睇都係大好事，咁就難怪，反對派點妖魔化一地兩檢都好，支持嘅民意始終係大多數。
呢嗱，有政黨訪問過二千幾名市民，發現有六成八人同意一地兩檢對體現高鐵效率非常重要；另外有超過六成人贊同落實內地人員喺香港境內執行內地法律嘅深圳灣一地兩檢模式；近六成人認同一地兩檢可為香港帶來經濟發展新機遇。民意好清晰喇！
反對派政客一味嚇鬼，成日話一地兩檢「割地賣港」，講到高鐵好似黑洞咁有入無出，講真，每日往返內地嘅港人摩肩接踵，公安點樣執法，上面法律有乜做得有乜唔做得，大家心知肚明；反而視一地兩檢如洪水猛獸嗰班政客，唔係身有屎唔敢返上去，就係連回鄉證都冇，為咗自己反中而剝奪廣大市民出行便利，簡直係赤裸裸嘅騎劫。
班政客平時懶係為民請命咁款，家陣民意彰彰明甚，照計應該收皮，可惜事實啱啱相反，身兼一地兩檢關注組聯絡人嗰位立法會議員，畀電台主持人兜口兜面問到，如果較多市民支持一地兩檢方案，會唔會改變立場，居然厚顏無恥咁話市民有市民支持，佢有佢反對，咁即係堅持與民為敵喇。喂，內地深圳灣口岸畀香港一地兩檢，行香港法律就理所當然，掉番轉頭就「割地賣港」，龍門任搬，你哋玩晒喇！
睇到呢度大家應該明白，班政棍為反對而反對，但求搞亂檔攤，無所不用其極，佢哋要求港府就一地兩檢安排進行諮詢，無非係緩兵之計，以拖待變嘅啫。咪畀人睇死，就算政府真係搞諮詢，就算九成九民意撐一地兩檢，佢哋一樣唔會善罷甘休，話唔定老羞成怒，學似「北大博士」咁大鬧「大眾係白癡」都有之！
話時話，反對派搞風搞雨，一意孤行，發動佔中係咁，搞垮政改方案係咁，依家又瘋狂阻撓一地兩檢，明知乞人憎都一味玩落去，講到底都係睇死港府冇佢哋符。淨係講收漢奸黎黑金，反對派政客幾乎人人有份，永不落空，結果得「長毛」一個被起訴，仲要明玩放生，律政司連上訴都嫌費事。至於漢奸黎本人更加不在話下，當局懼外症發作，連佢老哥條毛都唔敢掂一條，有啲人咪以為有恃無恐，可以橫行無忌囉。
冇計喇，港府弱雞吖嘛，玩包庇吖嘛，反中亂港勢力咪得米咯，咪不斷坐大阻住地球轉咯，咁搞法，香港人想耳根清淨都幾難，仲講咩大和解喎，發夢都冇咁早！