政情：沈祖堯借整月餅大談寂寞
科技太方便，有時都會令到日常社交生活出現奇怪現象，例如同家人同枱食飯都會互傳短訊。就連中大校長沈祖堯都遇到類似嘅情況，佢話自己有時夜晚睇手機時，竟然發現喺隔籬嘅太太傳短訊畀佢。
「好多人對住手機多過對人」
中秋臨近，正所謂人月兩團圓，沈祖堯就藉中大一年一度整月餅活動，講起寂寞。佢話有時就算好多人喺身邊都會有一種寂寞嘅感覺，依家好多人對住手機多過對住人，大家都係喺寂寞嘅互聯網空間。
佢認為，會唔會寂寞，其實係好視乎點樣利用同家人及朋友嘅時間，亦都視乎生活態度。講到中秋，佢就話大家可以分享月餅，分享係好事，每個人好多時都會喺心入面收埋好多嘢，屈埋好多嘢，只要將呢啲事好似呼吸咁噴出嚟，心情都會好啲。