政情：馮檢基玩「直」播網友寸打橫嚟
民協後生一代嘅深水埗區議員楊彧，最近大玩航拍介紹荔枝角海旁，為呢個老牌政黨帶來小清新嘅感覺，至於明年夠歲數攞長者卡嘅立法會前議員馮檢基，唔知係咪都想畀啲年輕嘅感覺一眾網民，佢都喺社交網站上玩直播，點知揸機角度超錯，有網友都忍唔住留言話「你都打橫嚟嘅」。唔知係咪寸緊佢「打橫嚟」點都要參選呢？
要打側個頭嚟睇
馮檢基直播兩次，分別大講近日政府計劃喺私樓設立由非牟利機構管理嘅劏房，話劏房唔適合小朋友住，另外又講到深水埗建制派區議員相關嘅地區團體申請撥款嘅事，兩條片分別約七分鐘同約五分鐘，由於係「直」播，如果喺網頁睇嘅話，就要打側個頭嚟睇嘞！
雖然睇「直」播嘅人數唔多，但仍有網友留言提佢「調番轉部機先直播啦」，又有人留言話「你都打橫嚟嘅」，而馮檢基喺直播後，仍有將段片留喺網上，但冇幾耐就自動下架，唔知係咪睇到網民嘅提點呢？