政情：審計狠插區會申報制度 民政局決心「執漏」
全港十八區區議會申報程序各有不同，可以話係各處鄉村各處例，過往亦屢次爆出利益衝突疑雲。雖然政府曾經喺今屆區議會作出改革，但審計署署長孫德基喺今年四月發表嘅審計報告中，表明關注區議會審批活動撥款時存有利益衡突。據悉，民政事務局將會參考申報程序比較完善嘅區議會，以設立指引供各區區議會參考。換言之，即係要「執漏」，透過今次改革撥亂反正。
指審批撥款過程有問題
現屆區議會任期由一六年開始，當時各區區議會均通過新修訂嘅當區會議常規，制訂咗長達十六頁嘅區議員個人利益獨立登記表格，並規定要將登記表格上載至區議會網頁，供公眾查閱以提高透明度。不過，雖然利益申報制度喺近年已經有改革，但審計署其後仍然發現有區議會撥款過程存有問題，令到民政事務局局長劉江華責成所有區議會監督，而立法會帳目委員會亦聽聞會喺九月作出跟進。
擬參考兩區制度訂指引
雖然審計署發現多區區議會存有問題，但並唔係所有區都做得差，因為北區同南區嘅把關工作就做得唔錯，聽聞民政事務總署就打算參考呢兩區嘅做法去訂立指引，再交由各區區議會參考以作出修訂，睇嚟審計報告真係逼到政府正視區議會申報問題喇！
南區同北區區議會喺審批撥款時均設有三級制嘅申報利益制度，其中南區嘅制度，第一級係議員身兼相關機構不具實務嘅職銜，例如名譽主席、顧問等，只需要喺討論前作出申報，就可以繼續參與有關討論同決議。而第二級係身兼相關機構具實務職位，例如主席、委員等，第三級係審批活動執行人，呢兩級嘅分別在於前者喺申報後可以出席會議，但係必須保持緘默，亦唔可以參與投票，後者則要喺申報後避席。
如果政府打算依照上述三級申報做法，相信議員嘅申報會更加詳盡。不過，唔同團體職銜定義各有不同，議員申報邊個級別就交番畀議員自行判斷，講到尾都係屬於自願性質，所以係咪可以堵塞現有漏洞，都仲係未知之數囉！