中環出更：林健鋒 陳淑莊狹路相逢爆口水戰
泛民立法會議員上周三集體杯葛參觀高鐵西九龍總站，但幾日後擔任「一地兩檢關注組」臨時聯絡人嘅公民黨議員陳淑莊又要求喺官員陪同下參觀。泛民「唔去又去」，引來唔少建制派議員微言，上次有份去參觀嘅議員林健鋒尋日忍唔住出口「寸」陳淑莊，爆發一場口水戰。
圍繞參觀高鐵站一事互寸
立法會三個委員會尋日舉行聯席會議，討論廣深港高鐵香港段一地兩檢安排，會議室內外嘅氣氛同樣(興)合合。事緣林健鋒喺走廊遇到陳淑莊，就問佢點解上周三唔去參觀高鐵西九龍總站，豈料陳淑莊即「撻着」，話「費事幫你哋揸機啦」。
林健鋒亦不甘示弱，反問「咁你哋（泛民）依家又要求去？」陳淑莊回應指有無官員陪同，分別好大，林健鋒再出招寸對方「係咪驚整花隻高踭鞋，所以要啲人去扶住你？」陳淑莊隨即反駁「年紀大扶吓你哋就真」。
雙方喺走廊你一言我一語，針鋒相對，被要求合照時，兩人停戰約一分鐘，然後今次到陳淑莊挑機，指林健鋒「個肚腩好似細咗」，林健鋒即刻話「參觀完高鐵一轉，即刻瘦咗啦」，再次暗寸泛民杯葛參觀。其後兩人見觀戰嘅人愈嚟愈多，於是分別走入會議室，結束咗呢場口水戰。
卓妮