中環出更：鄧肇殷自爆「笑笑口」做門市畀客鬧
好多人話香港依家一地都係大學生，到底讀大學係咪一定幫到佢哋將來工作，而冇學位嘅又點樣可以評估佢哋嘅工作能力？卓妮尋日喺一個活動上見到仁濟醫院副主席鄧肇殷（Erica），佢本身做化妝品同美容院生意嘅，佢透露大學時讀嘅科目同美容完全無關，初期返公司時仲主動要求落門市幫手，試過無啦啦畀客鬧，呢啲實戰經驗就令佢學識點樣同人應對，而資歷架構就好幫到佢哋了解員工有幾多經驗同埋能力喇！
話美容業重經驗多過學歷
香港化粧品同業協會尋日舉辦資歷架構友善僱主表彰計劃嘉許典禮，Erica嘅公司都有獲得榮譽大獎。講起大學冇美容呢科讀，佢就話有嘅話固然會有幫助，但亦可能理論居多。相反呢行着重實質經驗，大學畢業未必一定比老行尊做得好，佢曾經親身落舖幫手九個月，由做收銀到畀客人鬧都試過，以為對住客人笑笑口一定啱？佢就試過畀客鬧佢「笑乜笑，有咩咁好笑喎！」所以話好多嘢經驗先係最重要。
轉頭見到做男士美容生意嘅蔡敏思，原來佢當年一心諗住去英國讀心理學，所有嘢都準備好之際，阿媽突然嗌停，要求佢返公司幫手，結果大學夢碎，好在佢本身對美容行業都好有興趣，邊做邊讀晒有關證書，成功令公司業務穩步上升。佢話美容業從業員考取各種技術證書相比學位更實際，而手勢都係愈做愈上手。
同場仲有協會會長何紹忠同太太李翠瓊、理事洪玉芝及老公陳泳聰。何紹忠話業內需要嘅係有經驗嘅人，但唔一定要係大學畢業生，而資歷架構正正就係讓業內從業員拾級而上嘅階梯。陳泳聰就透露佢哋聘請員工嘅時候都會考慮佢哋過去工作嘅經驗同臨場表現比較多，學歷考慮非首要。
卓妮