「我住長江頭，君住長江尾，日日思君不見君，共飲長江水。」呢首宋詞的確夠晒浪漫，但如果將長江改為珠江，共飲嘅係油污水，咁就唔單止唔浪漫，仲隨時危害健康兼引發生態大災難添。
講緊嘅咪就係日前珠江貨船相撞事故囉，船上約九千噸棕櫚油硬脂應聲墮海，不斷擴散，香港位處珠江下游，梗係食到應一應喇。最弊係油污唔止隨海水流去大嶼山，仲流去南丫島同長洲，家陣又殺埋入港島泳灘及維港，連中環碼頭都睇到白色油污連同一條條死魚浮喺水面，十多個泳灘需要緊急關閉，都唔知點收科。
係人都知，港產官僚不嬲好似四方木咁，唔踢唔識郁，可能係社會各界高度關注啩，今次總算叫做有啲反應，可惜都係講多過做。海事處、漁護署、環保署一味話密切監察，但點樣清理油污就語焉不詳，仲強調棕櫚油對人體無害添，吹脹！喂，油污範圍咁廣，擴散速度咁快，淨係旨意清潔工人當海上垃圾咁撈，蚊都瞓蛇都死喇。
仲有喎，港府話就話油污對人體無害咋，之但係環保人士就有唔同講法嘞，佢哋話魚類及動物誤吞棕櫚油脂隨時窒息死亡，絕對唔係講玩。話口未完啫，大嶼山就有養魚戶投訴呢兩日多咗魚反肚，懷疑同油污有關，最離譜係漁護署唔准佢哋加設浮波阻截，但又冇積極清理油污，擔心損失慘重咁話。講真，金錢損失固然慘情，但受污染海產進入家家戶戶嘅餐桌仲大鑊，尤其係好多食肆都會用海水養魚，市民隨時畀油污穿腸過肚都唔知咩事。你知啦，官僚靠得住，豬乸會上樹，膠官為咗卸責乜都噏得出口，話油污無害喎，不如現場示範食畀大家睇吓先喇。
講到呢度，好多人可能同功夫茶一樣有個疑問，就係點解發生漏油咁大件事，幾日過去嘞，都唔覺內地有公布嘅？冇錯，意外冇人想發生，之但係發生咗就要公開吖嘛，尤其係香港遭受池魚之殃，相撞貨船誰屬，有乜善後安排，金錢損失由邊個埋單，都要得個知字啩，家陣內地方面黑箱操作，港府亦係十問九唔知，點可以咁不負責任o架。幾年前嗰單貨船膠粒墮海意外，涉事者都有承認責任兼幫手清理，今次呢鋪仲杰過上次嗰鋪，冇理由輕輕放過啫，吓話！
都唔知好嬲定好笑，粵港政府年年開會，年年交流，又吹水又灌水，又話達成幾多共識，簽署幾多協定，點知有起事嚟就失晒聯，通報機制形同虛設。呢，新政府咪話好打得嘅，如果唔想上台冇耐就民望插水，唔該快快趣趣搞番掂佢！