政情：八網難逃：林鄧兩家倫敦約梁卓偉食飯
趁住放暑假，愛沙尼亞共和國駐港名譽領事林建康同太太林黃寧艷（Lianne）帶兩個囝囝返倫敦屋企小住，同行仲有Lianne嘅閨密、保良局總理鄧宣宏雁一家人，跟住就會一齊坐郵輪歎世界。早幾日Lianne喺社交網站Facebook上載吃喝玩樂嘅靚相，見到香港大學醫學院院長梁卓偉（Gabriel）同佢哋一齊，唔講仲以為大家喺香港添！
究竟係巧遇定係事先約定？Lianne話Gabriel係自己去倫敦度假，佢事先已經知嗰段時間大家都會喺倫敦，所以特登約埋一齊食飯，佢仲介紹喺倫敦一間醫院做泌尿外科主任醫生嘅大姐夫Simon同大家姐Linda一齊出席交流吓添。