李宗彬散發女人味

短暫消失

每年南韓都有唔少高質車模出現，要喺呢個後浪不斷湧現嘅模特兒界生存，真係少啲實力都好難做得到，而李宗彬就係憑住出眾嘅條件，喺模特兒界縱橫多年，仍然人氣高企。早喺2008年佢以車模身份於南韓釜山國際車展上登場，當時佢青春嫩口，散發出鄰家女孩嘅清純氣質，加上一副火辣身材，立即成為全場焦點，及後佢嘅照片更喺網上瘋傳。之不過，當大家想深入了解阿妹多啲，卻發現搵唔到佢嘅資料，同時佢亦冇再出現，從此銷聲匿迹。

照道理，如果車模極速走紅之後，跟住落嚟一定會有大量工作，曝光率極高，點解李宗彬會反其道而行呢？及至2011年5月，佢終於再以車模身份喺車展上為汽車品牌站台，並向傳媒解釋之前消失車模界嘅原因，原來佢當其時係兼職車模，所以完成嗰次工作之後，就冇再參與其他活動演出，點知出乎佢同模特兒事務所嘅意料，竟然獲得極佳嘅評價，於是事務所就斟佢做全職模特兒，不過由於佢有感當時自己年紀尚輕，希望以學業為重，故此拒絕咗對方。然而，事務所一直都冇放棄，努力游說李宗彬入行，結果佢喺畢業之後決定投身模特兒界。

定下目標

成為全職模特兒後，李宗彬嘅工作接踵而嚟，同時佢變得愈嚟愈成熟，由鄰家女孩變成充滿女人味，最重要係面對大型場合時，表現大方得體，唔少人都大讚佢天生食呢行飯。不過事實又係咪咁呢？據佢講，其實背後下過唔少苦功，原來喺佢決定投身模特兒界前，覺得自己未夠實力，於是走去學瑜伽，又參加儀態班及接受模特兒訓練，同時又保持做運動嘅習慣，真係付出過唔少汗水（口架）。佢坦言曾經問過自己，係咪值得付出咁多努力呢？經過苦思後，佢發覺咁諗係錯，同時為自己定下目標，就係要成為模特兒界嘅超級巨星。當佢有咗呢個目的之後，即刻有番晒動力，而出道後嘅成績，亦印證咗佢過去所流過嘅汗水一啲都冇白費，喺一年內先後喺釜山、首爾等多個大型國際車展上演出，其後又化身電玩展Show Girl示人，與此同時，佢積極從事平面攝影模特兒嘅工作，令人氣大大提升。

雖然李宗彬喺模特兒界獲得出色嘅成績，但係佢一直都有個遺憾，就係從未做過賽車女郎，至於原因佢亦唔知道。但係點都好，憑住佢喺車模界及攝影模特兒界嘅人氣，已經足以證明佢喺業界嘅地位。

精彩推介

簡介：李宗彬雖然未做過賽車女郎嘅工作，但其實佢對賽車有相當嘅興趣，據聞佢嘅駕駛技術相當唔錯添！不過呢位迷人女郎平日仲有乜嘢活動呢？佢笑稱其實同唔少女性一樣，最愛化妝同Shopping。如果大家想了解阿妹多啲，就要Click入呢個網喇！

網址：http://cafe.daum.net/leejongbin

李宗彬Profile

出生地：釜山

身高：172cm

三圍：34、25、34

撰文：魂