政情：黃繼兒為保私隱 Fb戶口都冇開
個人資料私隱專員黃繼兒早前出書講解生活上各種私隱外洩陷阱，並以多個真實個案剖析《私隱條例》嘅法律根據同原則，講到私隱呢方面，唔知黃繼兒有冇職業病？佢就自爆手機得好少App，為咗保障個人資料，佢仲連Facebook戶口都冇開喎，真係夠晒穩陣。
裝App前會睇晒安裝條款
黃繼兒話每次安裝啲手機應用程式之前，都會好認真咁睇過晒啲安裝條款，舉例依家啲App十居其九都會要求取得用家嘅通訊錄資料等，部分拍照嘅應用程式又唔知點解要聯絡人資料，如果明明係冇需要卻又要求取得大量資料嘅，佢就會索性唔安裝嘞！不過，佢坦言有啲App取得資料後的確會方便好多甚至有優惠，所以想用就惟有自己衡量吓先。
連太太Rita都受佢影響，警覺性極高，話去旅行都唔會用出面嘅免費Wifi，會自己預備定，因為依家好多街外嘅免費Wifi都有唔少條款，又唔知安唔安全，寧願花少少錢用番自己嘅。黃繼兒笑言太太管個人資料都唔係最叻，管老公先最叻喎。