政情：鍾國斌黃碧雲惹公帑遊玩疑雲

立會以色列考察團 兩人延返港

考察團嘅行程係由上月廿二日至廿八日，去睇當地創新及科技產業發展同再工業化。而根據內務委員會嘅文件，每名參加考察團議員開支預算為二萬九千幾元至五萬三千多元，但實際開支仲要視乎行程、交通費、酒店訂房價格同埋參加人數。而當時就有十一名議員報名，但最後因梁國雄同姚松炎被褫奪議員資格，考察團就剩番九名議員，所以實際費用可能有所唔同。

另外，每位議員喺任內都有值五萬五千元嘅海外職務訪問帳目，而今次以色列考察團都會記入呢個帳目中，可以話今次外訪係由納稅人找數。不過就有議員延遲返港，唔知係咪趁機觀光，咁咪惹嚟使公費旅遊疑雲囉！

議員鍾國斌喺考察團結束後，仍然頻頻喺Facebook上分享以色列之旅嘅點滴，好似去死海邊睇書邊浮游，仲話跌咗本書落死海變咗睇「鹹」書，又話去咗伯利恆搵耶穌出世嘅馬槽等，睇嚟去咗唔少著名景點觀光喇！

鍾：做晒正經事先玩 黃：都算自費

鍾國斌依家已經返港，仲承認喺考察結束後喺當地留多咗三日。但佢直言，過往唔少議員進行海外考察都有早去遲返嘅情況，而且行程費用自費，所以唔認為會惹人詬病。佢強調自己做晒正經事務先玩，隨時問佢考察相關嘅嘢都識答咁話。

無隨團返港嘅仲有一舊雲，佢就順道去咗約旦，要下星期先返港，而旅程會睇約旦古城遺址，亦會留意以色列同約旦嘅農業計劃，睇吓點樣喺沙漠乾旱無人地帶開發農業喎。佢又強調旅程無增加外訪開支，而且放假並非只為休息，因為都算係自費考察，更話咁樣安排更環保，可以減少碳排放添！

其實議員外訪早到遲走確實並非新鮮事，亦被人質疑過係咪用公帑旅遊，尤其議員嘅一舉一動都畀公眾望到實一實，所以做任何決定同行為，真係要小心謹慎先得喇！