中環出更：鍾樹根「臨老學打機」未定補選

鍾樹根自舊年卸下立法會議會身份之後，生活多姿多彩，轉行做農民種日本番薯，閒時就去品茶，甚至「做facial」，而佢最近就作出人生第一次嘗試——玩電競，仲自嘲臨老學打機添！

最近香港電子競技總會副主席楊全盛（Eric）開咗全港首間以電競為主題嘅酒吧，熱衷嘗試新事物嘅樹根大感興趣，喺Eric邀請下一嘗乜嘢叫電競。樹根日前上載到Facebook嘅打卡相，見到佢狀甚輕鬆咁坐喺電腦面前，旁邊嘅大螢幕顯示佢正在玩格鬥遊戲，而佢亦喺張相留言自嘲「臨老學打機」。

玩完電競有乜嘢感想？佢話今次係人生第一次上網同人玩對戰遊戲，但就話已經唔記得玩緊乜嘢遊戲，淨係知遊戲內嘅角色動作好快，自己完全跟唔上節奏喎。

聽落打機似乎唔多啱佢玩，咁會唔會返去政治老本行，參與因羅冠聰喪失議員資格嘅立法會港島區議席補選呢？佢就話目前身處廈門，香港嘅事「睇定啲」再算，但就無明言拒絕囉！

卓妮