中環出更：阮明園笑迎手風琴春天
靚女歌唱家兼香港國際音樂交流促進會主席周詠琁，日前喺香港大會堂舉行一場「香江情‧中國心華人藝術盛典」音樂會，數十位中港兩地嘅世界級藝術家同小朋友一齊演出，吸引咗大批城中名人去欣賞。手風琴世界冠軍阮明園都專程來港演出，講起手風琴，香港好少人學，事關無論喺中、西樂團都冇手風琴樂手嘅一席之地，但阮明園笑笑口話內地近幾年出現新趨勢，喺交響樂團內加入咗手風琴獨奏，難怪佢形容手風琴嘅春天已經來了。
阮明園嘅爸爸同阿爺都係手風琴老師，所以佢自細就學手風琴。雖然小朋友學樂器多數鍾意湊熱鬧，最好可以加入管弦樂團或者中樂團玩，但阮明園就笑稱獨奏都好愉快咁話。
當晚嘅重量級表演嘉賓仲有國家級二胡大師陳軍同囡囡、有「二胡小公主」之稱嘅陳依妙，父女倆精彩嘅演奏令台下聽眾聽到如癡如醉。
周詠琁搞音樂會 一眾老友撐場
當晚去欣賞音樂會嘅仲有香港婦協副主席孔美琪、中華總商會會長蔡冠深太太蔡關穎琴、時裝品牌副主席陳徐巧嬌同名媛王蓓芬等人。「M超跑會」創會主席馬仁威（Kelvin）同太太都有去欣賞，Kelvin笑稱唔識樂器，當晚純粹去支持好友周詠琁。
見到咁多老友嚟打氣，周詠琁無論幾辛苦都話值得喇！事關佢過去一個月一直喺歐洲巡迴演出，返港後都未有時間好好哋瞓覺。今次除咗音樂會之外，仲係第一次舉辦中港兩地青少年藝術大賽，佢話希望藉着文化交流促進兩地融合，期望年年都可以繼續辦落去。
卓妮