政情：認欠政通人和 張建宗落區「通渠」
正所謂「有錯就要認，打就要企定」，政務司司長張建宗尋日落區去到屯門，同區議員閉門會議嘅時候認錯都比喻多多，據稱佢用血管同水管塞咗要通去比喻地區問題，相信都係承認緊唔夠政通人和啦，不過佢又用阿拉丁神燈有限願望嚟比喻政府能力有限，唔能夠一下子解決所有問題喎。認錯還認錯，講真嗰句，張建宗都唔係第一年做問責官員，而家講唔夠政通人和，會唔會有啲太遲講呢？
仲記得張建宗早前講過要加強溝通，所以司局長都要多啲落區探訪、聽民意，又話唔驚畀人圍。張建宗尋日再度落區，與屯門區議員閉門會面，喺佢到埗前都有幾班示威者「恭迎」佢，但都算平和，冇發生衝撞嘅場面。
到底同區議員有乜密偈傾？屯門區議員葉文斌會後引述張建宗嘅說話，指佢用血管同水管塞咗去做比喻，話需要「架生」嚟通，而「架生」就係指中央，部分地區問題需要中央出手解決，官員唔應該以藉口嚟「耍」議員。咁聽落，張建宗似乎都係認以前唔夠政通人和，依家需要幫手通吓佢嘞！
阿拉丁神燈喻政府能力有限
葉文斌又話張建宗又以阿拉丁神燈作比喻，指願望有限，希望議員先有共識，就可以方便官員做事，而且應該定下優次，先去解決較易嘅問題。咁即係承認政府能力有限啦，唔知係咪等議員以後唔好有太高期望呢？
其實張建宗都算坦白，但係咪落吓區聽吓啲議員同市民吐吓苦水，就真係能夠做到政通人和呢？若果齋聽唔做，都只不過係做騷啫，呃唔到幾耐就穿煲喇！再講，上屆政府開波嘅時候，班司局長都係咁密密落區，但結果係點呢？屢次受到衝擊之後咪收皮囉！張建宗望就望新問責團隊唔好有差錯或者爆出乜嘢醜聞，否則呢場民意騷都做唔長。