中環出更：唔熟護膚品邵家輝扮靚險毀容
國際美業評審總會（總會）日前舉行理事會就職晚宴，城中扮靚達人齊集，立法會批發零售界議員邵家輝都去撐場。講起扮靚心得，佢笑稱自己唔係貪靚之人，平時連護膚品都唔用，只係用洗面奶，但有次佢覺得皮膚好乾，於是攞咗屋企人啲護膚油擦面之後去瞓覺，點知第二朝起身成塊面龜裂晒，似足鬧旱災時嘅土地，究竟發生乜嘢事？
原來邵家輝錯將卸妝油當護膚油，所以扮靚差啲變「毀容」。不過，佢話經此一役，皮膚反而靚番好多喎。當晚出席嘅業界人士個個心情靚靚，邵家輝就話近幾個月零售業市況已經回暖，大家心情梗係靚番晒喇！以前零售嚴冬嘅時候，業界連大型活動都冇心機搞添！
朱雯迪致力推動業界發展
總會會長朱雯迪就話過去業界面對唔少挑戰，所以總會致力推動業界合作、海外交流同推行資歷認證計劃等，以凝聚業界力量，爭取業界權益，並努力回饋社會，未來將繼續以「專業、互愛、活出善康美」為行業同社會作出貢獻。
當晚亦頒發多個獎項鼓勵出色嘅業界人士，其中總會名譽主席趙青獲頒「傑出企業領袖人物」及「至尊企業品牌」兩項大獎，總會青年企業發展委員會主席黃嘉禮、香港形象設計師聯盟會長林樹欣同晚宴籌委會主席羅小華亦有份攞獎。
同場仲見到教育局資歷架構秘書處總經理彭炳鴻，講到近年美容從業員好勤力考試取得資歷認證，唔知係咪考試考得最多的行業？佢笑稱冇統計過，不過近年比較突出嘅係大廈保安員，因為實施最低工資之後好多人入行，個個都爭住攞資歷認證傍身囉！
卓妮