香港人出名精叻轉數快，肯吸收外來新事物，呢個亦係彈丸之地賴以成功之道，可惜唔知由幾時開始，部分港人心態愈來愈封閉，目光愈嚟愈短淺，尤其係面對內地嘅進步，心理更加唔平衡，由自卑變自大，諗落都幾悲哀。
話說本港有巴士公司訂購內地製造單層電池電動巴，尋日正式投入服務，行走三條路線，可惜其中一架出師不利，行行吓「跪低」咗，乘客需要轉車。本來只係小事一宗，點知部分網民幸災樂禍，揶揄巴士「冇爆炸到已經係意料之外」，簡直吹脹。
「國產電視機會爆炸。」港產國際影壇巨星十年前嘅「金句」，已經成為部分人嘲笑內地產品嘅萬能key，國家第一艘航母「遼寧號」來港，有啲人彈到一文不值，其實大部分係門外漢嘅偏見，佢哋睇國產電動巴唔順眼，一啲都唔出奇，試吓今次出事嘅係日本又或者歐洲車，睇吓啲友仲有冇咁多聲出！
好心啲人唔好戴住有色眼鏡睇嘢喇，潮流興講節能減排，電動車取代傳統柴油及汽油車，已經係不可逆轉嘅大趨勢。法國同英國上個月相繼宣布從二○四○年起全面禁售汽、柴油車；至於德國呢個傳統汽車大國更加進取，計劃二○三○年全面禁用汽油車。當然喇，本港巴士公司引入電動車，一定要貨比三家，充分考慮性價比、安全性等一籃子因素，唔係話非國貨不買，更何況類似「跪低」事故之前都發生過，監管部門喺安全把關方面必須打醒十二分精神，但無論點講都好，一次拋錨就判「死刑」，未免武斷咗啲啩。
講番電動車，雖然仲有唔少技術難題，但隨着科技進步，問題自會迎刃而解。例如墨烯電池嘅發明，有望大大改善傳統鋰電池損耗快、充電時間過長等問題。發達國家為淘汰傳統汽、柴油車訂立時間表，證明佢哋睇好新能源車嘅長遠發展。
冇錯嘞，新生事物發展過程難免出現曲折，幾年前溫州動車追尾事故，唔少人批死中國高鐵唔掂，結果咪又係通地眼鏡碎。又好似電子支付技術咁吖，曾幾何時香港八達通技術獨步全球，可惜之後原地踏步，被內地後來居上。早排杭州有兩個笨賊打劫便利店，結果所得現金得雞碎咁多，幾乎連買架生錢都唔夠，可見內地早就進入「無現金年代」，香港連車尾燈都望唔到！
始終都係呢句︰眼界決定境界，態度決定高度，香港創科搞極唔掂，除咗政府因循苟且，目光如豆，民眾心態跟唔上亦係大問題，長此下去，遲早被科技潮流淹沒嘅咋！