政情：陳家強執番身彩冇穿冇爛返「娘家」
古語有云「有人辭官歸故里，有人漏夜趕科場」，唔少人相信急流勇退先至係智慧。前任行政長官及政治委任官員離職後工作諮詢委員會（委員會）尋日公布，財經事務及庫務局前局長陳家強將會喺今日重返「娘家」香港科技大學，擔任兼任教授。眼見唔少舊同事喺「熱廚房」燒到燶晒，反觀陳家強做咗十年問責局長，雖然講唔上有乜大建樹，但亦冇乜惹火嘢，冇焦頭爛額咁離開熱廚房，佢都算係執番身彩喇！
重回科大執教鞭
陳家強離開官場前曾盛傳會重返校園，而委員會尋日亦認同佢重返科大教書唔會有利益衝突，但佢就要遵守多項規限，包括唔可以參與財經事務及庫務局、政府統計處、公司註冊處、政府物流服務署等部門嘅競投項目，工作亦唔可以使用或向任何人透露佢作為局長時得悉嘅資料。
點解話陳家強執番身彩，睇吓佢啲舊同事咪知囉！好似人稱「吳得掂」嘅教育局前局長吳克儉，除咗民望長期包尾之外，佢上任時就鬧出國民教育風波，之後發生小三全港性系統評估（TSA）過度操練嘅事件，搞到佢成身都「着晒火」，甚至被人批評佢不時外訪做「外遊局長」，將手頭上嘅工作卸畀副手處理。
難做嘅當然唔只佢一個，運輸及房屋局前局長張炳良喺卸任之前亦都大吐苦水，話自己應邀做局長時，只係打算管房屋，冇諗過要搞埋交通運輸，點知政府架構重組失敗，自己都分身不暇，最終搞到公屋平均輪候時間超過四年，情況比自己預期更差，搞到自己都覺得好挫敗。
在位十年少負評
政府換屆之前更加出現重大人事變動，副局長蕭偉強同馬紹祥臨危受命，接任勞工及福利局局長同發展局局長，兩人任命前已打晒開口牌話做局長好大壓力，蕭偉強更加自爆做局長每一日都覺得好長，一換屆就頭也不回、走夾唔抖，慌死走遲啲會燒死咁款呀！馬紹祥更加話離開熱廚房之後要抖吓先。
陳家強在位十年，一直冇搞出乜嘢風波，仲可以冇乜負評咁離開熱廚房，依家重返娘家教書，相信亦係一個好歸宿兼有可能更上層樓添，事關外傳佢有機會接掌科大校長，究竟真定假，大家拭目以待喇！