中環出更：鄭松泰毛孟靜收「錢」免申報

社民連成員「長毛」梁國雄涉嫌收受壹傳媒黎智英廿五萬元但未有作出申報，被控一項公職人員行為失當罪。雖然法庭尋日裁定長毛罪名不成立，但佢嘅舊同事，立法會議員鄭松泰、毛孟靜就立即收到「錢」，佢哋要記得作出申報，以免好似長毛咁惹上官非喎！

其實鄭松泰同毛孟靜所收到嘅係陰司紙，所以毋須向立法會作出申報喇！寄件人將一張由「天地銀行」發行、面值一百萬嘅陰司紙，連同一封信一併寄到二人位於立法會大樓內嘅辦公室，而兩人所收到嘅信件內容完全相同，該封信用詞粗俗，又將收件人稱為「漢奸」、「走狗」等，而且文筆唔太通順又有錯字。

現時獲鄭松泰聘請為地區辦事處主任嘅熱血公民副主席鄭錦滿，尋日喺Facebook上發文，稱該封附有陰司紙嘅信件已經被佢截獲。不過，寄件人唔使灰心，因為鄭松泰已經喺Facebook上睇到封信，更大嘆信中內容有啟發性，仲話想回信添！如果寄件人有寫回郵地址，或者可以同鄭松泰發展到做筆友喎。

卓妮