中環出更：謝偉俊37℃着西裝褸為貪靚？
本港日前刷新今年最高氣溫紀錄，其中黃大仙等八個地區仲升穿三十七度，炎炎夏日之下，就算係着短袖衫褲都令人汗流浹背，點知立法會議員謝偉俊（Paul）出席中山社團總會一個喺黃大仙搞嘅戶外活動時，竟然着埋西裝褸都似乎冇乜出汗，睇番佢隔籬嘅立法會議員柯創盛，就算着住短袖恤衫，都已經熱到流露出個辛苦樣，唔通阿Paul發冷？
阿Paul就話其實自己都有出汗o架，喺西裝褸入面都熱到濕晒，但佢每逢出席活動要上台，都會盡量着西裝褸，覺得咁樣好似比較尊重喎。聽落就知阿Paul係貪靚之人嘞，佢仲話自己就算夏天都盡量唔會飲凍嘢，因為中醫話飲凍嘢好易有肚腩o架！
同場仲有着透薄長袖嘅立法會議員麥美娟（Alice），佢話自己嘅血型係O+，聽人講呢種血型係好惹蚊，而佢亦確實好易被蚊咬，所以就算天氣好熱都只能着長袖衫，否則好快就會被咬幾啖o架啦。Alice話每次聽到有朋友去馬來西亞，就會拜託對方買豆蔻膏，夏天會隨身帶住，除咗被蚊咬咗可以搽，平日頭暈都可以搽吓。
李曠怡唔敢去菲律賓潛水
見到菁英會執委會委員李曠怡都着咗長袖衫，似乎唔算好怕熱，佢話夏天鍾意玩水上活動，同家人去馬來西亞旅行嗰陣，都有特別去潛水睇吓珊瑚等。其實佢最想睇鯊魚，相信海底畀人見到嘅鯊魚都唔驚人，但係可惜就冇遇見過。鯊魚都唔驚，但係李曠怡就唔敢去菲律賓潛水嘞，佢話之前都聽到有啲新聞話，有兩、三個人潛水失蹤嘅意外，所以自己都怕怕。
卓妮