運房局局長陳帆前排話考慮資助社企收購唐樓，以成本價租畀輪候公屋嘅市民，話口未完，有團體表示已獲業主提供空置單位作過渡性房屋之用。港產官僚今次都算做到啲嘢，點都好過坐而論道，之但係以有限「劏房」紓緩基層龐大住屋需求，唔單止杯水車薪，更加同飲鴆止渴冇乜分別。
今次團體同市建局合作，將位於旺角豉油街一幢大廈嘅十四個單位，提供畀有需要人士作過渡性房屋，有關單位屬兩房或三房單位，每間房住一戶，平均居住面積唔少於七平方米；至於租金就會訂喺低於市價水平，即係每月五千元以下，最多可以住兩年。
冇錯，無殼蝸牛焗捱劏房境況堪憐，幫得一個得一個，呢點無可厚非，問題係家陣全港有二十萬劏房戶，要幾多類似單位至可以解決問題？仲有吖，依家輪候公屋條龍愈排愈長，平均要四年幾五年至上到樓，部分甚至等十年八載，依家兩年後又要搬竇，唔通打回原形捱地獄劏房？
陳局長猛咁叫人唔好用「劏房」形容新計劃，又難怪嘅，講起劏房，大家即時諗起上床下廁又或者豬欄雞棚貨櫃改建嘅豆腐膶，你估真係貪好聽咩？之但係無論個名改得幾好聽都好，幾戶人家共用廁所廚房，香港貴為全球最富裕城市之一，竟然倒退番上世紀七層徙置大廈嘅年代，點都講唔過去喇，吓話！
講到尾，一日唔增加公營房屋供應，出咩花招都係嘥氣。咪睇香港地好多人冇屋住，查實有好多屋都冇人住o架，好似今次計劃咁，明明位處市區就腳筍位，點解仲有咁多空置單位？原來上址係市建局用嚟安置受重建影響，但唔符合房屋委員會及房協入住公屋資格的租戶暫時入住，奈何資源錯配下，空置率高近八成；其他三個位於大角咀、荔枝角以及西環嘅三幢同類大廈，空置率亦由四至六成不等，都咪話唔誇張。
港府一方面猛呻地從何來，另一方面任由土地閒置，暴殄天物，上述情況只係冰山一角。申訴專員公署最近就踢爆房屋署浪費公共屋邨大量公共空間，部分被闢作儲物室，部分屋邨大廈低層甚至有整列相連無人空間，證明所謂見縫插針、寸土必爭純屬廢噏，至於其他佔用官地嘅私人會所、廢車場以至未開發嘅棕地，浪費幾多珍貴土地資源，更加不在話下。
上屆政府連郊野公園都唔放過，結果被人鬧盲搶地。新政府話唔排除研究填平船灣淡水湖，怕且都係一擔擔。正如有人話齋，香港咁多權貴專用嘅高爾夫球場，從來唔見港府收番起屋，嫌貧愛富，欺善怕惡，民怨唔爆煲就有鬼喇！