政情：楊潤雄向小學生硬銷高鐵
高鐵一地兩檢方案出台後，多名負責相關政策嘅問責官員，排住隊輪流上電台電視向公眾推銷，就連睇嚟冇乜關係嘅教育局局長楊潤雄，尋日亦喺一項教育活動上，主動向一批小學生硬銷高鐵。佢話高鐵一地兩檢盡快搞掂，可促進兩地學生交流，等同學可以到內地見識學習喎。
又指TSA「考完健康快樂」
其實依家不論係學校定係旅行社，都已經搞緊好多內地遊學團，搭飛機、坐船、坐旅遊巴嘅都有，有冇高鐵影響唔大。反而係高鐵通車之後，公眾可能擔心班高官會爭住試坐，藉訪問考察名義到內地旅遊玩樂，重蹈前任教育局局長吳克儉嘅覆轍。
楊潤雄又主動向班小學生提及TSA，強調TSA「好多同學仔考完都健康快樂，小朋友唔需要驚」，好彩佢冇用TSA嚟比喻一地兩檢啫，如果唔係可能有好多學生以後都唔敢坐高鐵。