政情：貨櫃議辦熱辣辣 陳思靜被疑虐貓
香港正值炎夏，唔止人辛苦，寵物都覺難捱。喺天水圍西鐵站外以貨櫃作為議員辦公室嘅元朗區議員陳思靜，甘當「剷屎官」喺辦公室養咗兩隻貓咪。不過，有網民尋日在網上貼圖，指陳思靜嘅貨櫃議辦內，兩隻貓咪經常貼住門邊抖氣，質疑議辦無開冷氣，擔心貓咪嘅健康狀況。
稱遭抹黑 指議辦24小時開冷氣
陳思靜得悉後即在Facebook反駁，話虐貓言論係抹黑，強調議辦係二十四小時長開冷氣，仲保持室溫二十六度添。至於兩隻愛貓貼近門邊，純粹係因為佢哋鍾意，路過嘅市民見佢哋咁可愛，仲經常逗佢哋玩。睇嚟今次惹來虐貓疑雲，都係誤會啫。
陳思靜又趁機分享開冷氣嘅心得，聲稱做過實驗，如果冷氣又開又熄，重開冷氣時就要將室溫由四十度降溫到二十六度，耗電量反而比全日開冷氣更高，所以長開冷氣嘅電費仲平啲添。