政情：蕭煒忠愛遊黎巴嫩 流連忘返
港人暑假外遊除咗歐美等熱門地點，亦有人選擇去中東玩。香港馬主協會理事蕭煒忠（Danny）就非常喜歡黎巴嫩，去過黎巴嫩好幾次。事關Danny做成衣貿易生意，佢話黎巴嫩人主要信奉伊斯蘭教，佢哋寧可省吃儉用，衣着方面都要追求時髦喎。
Danny話黎巴嫩素有「東方巴黎」之稱，雖然佢哋咁貪靚，但係又唔積極發展製衣工業，所以好倚賴入口成衣。連鄰近國家嘅商人都會去黎巴嫩買來路貨，所以當地經濟情況都算唔錯，高檔酒店同摩登購物商場林立。加上沿住地中海有一條漫長嘅海岸線，又有好多歷史古蹟，當地人亦好友善，所以令人流連忘返。
鄰國爆內戰 怕被波及唔敢去
雖然Danny咁鍾意黎巴嫩，又好想再去，但鑑於鄰國敍利亞爆發內戰，儘管戰火未越界，但始終炮彈無眼，為免遭池魚之殃，所以都係等局勢緩和之後再去喇。