中環出更：岑智明否決「葡撻」做颱風名
近期西太平洋非常熱鬧，繼早前試過「洛克」及「桑卡」雙旋同時出現喺香港八百公里範圍後，近日又有「納沙」及「海棠」。不過，大家有冇想像過，有一日會遇到「葡撻」、「菠蘿包」等以食物命名嘅熱帶氣旋襲港呢？天文台台長岑智明早前就粉墨登場拍片，親自解釋熱帶氣旋點樣命名，更透露曾差啲出現颱風「葡撻」添！
話「葡撻襲港」太搞笑
天文台官方網頁最新上載一段《氣象冷知識》影片，岑智明同前天文台台長林超英齊齊出現。岑智明話，澳門曾建議用當地著名嘅「葡撻」作為熱帶氣旋名，但佢就認為作預報時話「葡撻襲港」會太搞笑，所以有關建議就被佢否決咗，難怪大家無緣見到以特色食物命名嘅颱風喇！佢又話，若然熱帶氣旋吹襲期間造成太大人命傷亡，就會除名唔再使用，好似「海燕」、「威馬遜」等。
林超英就講解命名機制嘅由來，喺二○○○年起，太平洋周邊十四個國家同地區各自提交十個名稱輪流使用，所以有關命名更有本地特色。
卓妮