中環出更：葉傲冬自爆生日常撞正打風
假期遇上打風，令好多打工仔覺得好冇癮，但如果生日總係遇上打大風，又點算？油尖旺區議會主席葉傲冬就經常生日撞正打風。早幾日卓妮喺一個活動上同一班名人講起打風話題，葉傲冬就自爆已數唔出第幾次生日當日遇着打大風，因為佢出世當日已經係打風天，上周日香港掛起八號風球，就正正係佢嘅生日。難怪佢見怪不怪喇！
葉傲冬講起生日撞中八號風球，反應好冷靜，因為佢身經百戰，幾年前仲遇過好少見嘅十號風球添！佢話打風唔會影響佢慶祝生日，因為慶祝活動多數喺戶內進行，好似當年掛十號風球，佢照舊同家人去酒店食自助餐。
彭徐美雲笑談打風活動係瞓覺
當日活動係尖沙咀街坊福利會會慶暨理監事就職典禮，同場仲有國際婦女會主席彭徐美雲、油尖旺婦女會創會會長趙鳳儀、獅子山獅子會理事李豐年及董事林月明等。彭太話，廿幾年前嘅天文台預報不及今日先進，唔會預告幾時掛波同落波，所以當年佢試過趁八號風球相約朋友打通宵麻雀，打到興高采烈時，天文台突然喺凌晨改發較低風球，結果第二日眾人就齊齊帶埋一對熊貓眼返工。經此一役，佢笑稱每次打風嘅活動就係瞓覺喇。
經營糧油生意嘅李豐年就會參考通勝，睇吓當年多唔多雨水。佢話泰國同國內嘅雨水多寡會影響其生意原材料嘅收成，所以佢習慣睇通勝，如果多雨水就會趁早入定，以免價格上升入貴貨。佢話根據多年嘅經驗，認為通勝同傳統智慧都有一定嘅參考價值。
卓妮