中環出更：鄺海峰「誘」創意 發掘蝸居救星
香港居住空間狹窄，愈來愈多納米樓，點可以喺固有空間下作出變化，就要靠設計師嘅功力。早前香港知專設計學院舉辦「2017鋁遊家設計比賽」，學生以一個三百呎大小嘅移動屋為基礎設計一個多元功能居所，當中唔少設計都好有創意，其中一組學生就要以被喪屍追殺為前提，設計咗一間可以透過跑步發電的移動屋。
卓妮見之前攞過賽車獎項嘅鄺海峰都係評判之一，原來佢家族做開鋁材生意，於是諗到可以用鋁材嚟建造移動屋，除咗可以用嚟住，仲可以用作商業等其他用途，冇貨櫃屋嘅隔熱問題、可隨時移動又可以避免建築期間對環境造成破壞。而佢見香港居住環境細得誇張，往往考起唔少設計師，於是就諗到比賽用呢個主題，培養一班學生點樣由絕處爆發創意，發掘新一代港人「蝸居」救星。
黃卓健用200呎做多用途屋
曾喺內地節目將中環一個二百幾呎單位設計成多用途屋而聲名大噪兼獲得「空間魔術師」稱號嘅建築藝術家黃卓健亦係評判之一。佢話女兒喺市區讀書，一家四口搬到銅鑼灣嘅二百呎單位，憑個人經驗以港幣十幾萬元就將二百呎化身一千呎單位使用，集全家休息、工作同玩樂空間於一屋。對於香港細到離譜嘅單位，佢認為充分善用空間作多元用途好重要，今次其中一隊得獎作品構思就係圍繞皮膚敏感嘅人點可以透過移動屋隨時在家浸泉水。
亞太區室內設計大獎籌委會主席許諾、香港知專設計學院產品及室內設計學系高級講師朱永康都在場。許諾指為納米單位設計時思維一定要轉變，一件家具多用途或可變性都係大趨勢。
卓妮