中環出更：波哥修改會議程序 防立會「打風」
立法會財務委員會近年成為拉布嘅重災區，財委會本立法年度最後一次會議時，更因為議員拉布令多項撥款未能通過。財委會主席陳健波（波哥）終於出招修改會議程序，建議行為極不檢點嘅議員一旦被趕離會議室，同日將不得回席；而每名議員只能就每項撥款提出一項臨時動議。波哥話修改會議程序係做好「防風措施」，令議事規則更紮實，仲反問會唔會有人因為咁譴責天文台。
話想換更多討論時間
波哥話限制每個議員只能就每項撥款提出一項臨時動議係合理，解釋議會有六十幾個議員，每人發言一分鐘都已經六十幾分鐘，而且臨時動議「有姿勢、無實際」，咁做唔係要收窄議員議事空間，反而希望換取更多正式討論嘅時間。
對於民主派之前講明唔可以讓會議如常舉行，波哥話佢依家嘅建議係做好防風措施，令議事規則更加紮實、議會可以繼續運作落去。佢又話若果民主派認為佢做錯，應該用道理說服佢，而唔係「亂扣帽子」對佢作出譴責。
卓妮