一個人窮到連仔都要賣，好明顯係走投無路喇，漢奸黎出售《壹週刊》有幾折墮，諗都諗得到。之但係人做契弟佢做契弟，一味死剩把口，話咩「賣仔莫摸頭」喎，最怕個仔唔使摸已經畀人彈番轉頭，咁就笑大人個口嘞。
即係咁，舊陣時窮人賣仔，唔係你肯賣就實有人肯買，都要睇吓個仔嘅長相係咪四正，四肢係咪健全，智商係咪正常，一個唔覺意買咗個三尖八角、成身毒瘡嘅傻仔返去，咁就手尾長。漢奸黎家陣窮途末路，急於賣仔撲水，之不過個仔見唔見得人，值唔值呢個價，大家一早心中有數。
好簡單，壹淫媒誨淫誨盜，旗下刊物違反《淫褻及不雅物品管制條例》嘅案底仲厚過電話簿，淨係涉及今次出售嘅台港《壹週刊》咋，夾埋被罰最少幾十次，個朵臭到街知巷聞，邊個掂盞邊個死。仲有喎，壹淫媒引入狗仔隊文化揭人陰私，仲要老作唔使本，受害者上至城中富豪下至七線明星仔都有，甚至連洗廁所阿姐都唔放過，單係被人告誹謗兼賠錢筆數已經長過阿婆塊紮腳布，絕對係傳媒之恥，咁就難怪被讀者及廣告商拋棄，愈出愈薄好似蟬翼咁薄。咁你話喇，買份咁嘅衰嘢返屋企，同倒錢落鹹水海有乜分別吖？
嗱，漢奸黎急住賣仔救亡就梗o架喇，但賣唔賣得成仲要睇過至知。正如金融界人士話齋，壹淫媒至今只係收到一千萬元誠意金咁大把，佔所謂嘅五億元成交價百分之二，同一般商業交易收取一成訂金嘅規矩相差十萬八千里，質疑個仔「未必賣得成」。咁又係呀，連誠意金都咁冇誠意，有變數都唔係冇可能(口架)。再講吖，台灣當局已經講明，出版業仲未開放畀大陸資金投資，如果交易涉及大陸資金或者有呢方面嘅疑慮，煞停都似。睇到喇，漢奸黎以為賣完仔就可以捲鋪蓋走人咁疏肝，隨時打錯算盤嘅咋。
話時話，睇番壹淫媒賣仔嘅黑歷史，就知交易臨尾香一啲都唔出奇，最經典梗係台灣壹電視喇，話賣又唔賣，唔賣又賣，畀人玩到謝晒皮。所以話啫，乜嘢賣仔莫摸頭喎，賣到先講啦，分分鐘個仔賣唔出之餘仲要畀自己爽死咋。大家有眼見，咁多年嚟被漢奸黎爽死嘅仔不在少數，《爽報》極速爽死固然係佼佼者，仲有《壹本便利》呀、《忽然1周》呀等等，咪又係通通埋葬喺堆填區。
佛偈都話喇，萬法皆空，因果不空。漢奸黎同壹淫媒禍港殃民咁多年，正一神枱貓屎，神憎鬼厭，《壹週刊》嘅下場係點，壹淫媒嘅報應又係點，即管放長雙眼喇。