立法會財委會經過七個多小時，喺混亂中通過三十六億元教育新資源撥款，期間多名民主派議員提出二十多項臨時動議燃燒時間，建制疑「暗助」拉布，一反常態冇反對臨時動議，甚至要求提出討論，就喺千鈞一髮之間，民主黨黃碧雲（一舊雲）於財委會主席陳健波「提水」下，破天荒提出縮短表決鐘聲時間，當場遭到建制派揶揄，而激進泛民事後大鬧一舊雲冇抗爭意志。其實一舊雲今次出手只係為咗教育新資源撥款唔好難產，殊不知最終「中箭」兩面不是人，真係時也命也！
